Varias plataformas de venda en liña naceron nos últimos meses para levar os produtos agrogandeiros directamente aos consumidores sen intermediarios.
A pandemia apurou a creación de plataformas deste tipo, un xeito diferente de chegar aos consumidores e de ampliar o mercado, que antes só estaba dispoñible para as grandes empresas.
“Persoas que antes non compraban por internet empezaron a comprar. Os produtores temos que estar á altura deses clientes“
"A pandemia acelerou o proceso, foi froito dunha necesidade. Iso fai que agora unha plataforma coma a nosa sexa necesaria ou estea nun momento de mercado adecuado, porque o cliente demanda un servizo en liña de todo tipo de produtos", sinala o xerente de Rutal Sell, José González. "Persoas que antes non compraban por internet empezaron a comprar. Entón, os produtores temos que estar á altura deses clientes", conclúe Román Sánchez Besteiro.
En 24 horas
Lácteos Conchy, de Friol, vende agora directamente en internet o leite e o queixo fresco que producen as súas vacas. E coma eles, outros pequenos produtores, agrupados na mesma plataforma de venda na rede.
O representante César Modia cita unha das vantaxes. "O meu leite ao mellor interésalle só a un cliente, pero ve a carne doutro e ve o marisco doutro. Entón, ímonos complementando uns con outros".
O Mel do país do abelleiro, nas montañas de Negueira de Muñiz, entre Galicia e Asturias, ou carne das vacas dunha cooperativa dos Ancares pode chegar a calquera punto da Península en 24 horas.
“Esa é a chave destes proxectos, porque grazas a internet podemos eliminar intermediarios e conseguir mellores prezos“
Prescindir de intermediarios na cadea de comercialización e lograr mellores prezos é outras das vantaxes. "Esa é a chave destes proxectos, porque grazas a internet podemos eliminar intermediarios e conseguir mellores prezos. E nunha provincia eminentemente agrogandeira coma Lugo, pensamos que é a chave para ter futuro", afirma Román Sánchez Besteiro.